39 fólkaskúlar, tveir frískúlar og ein serskúli

Skúlaárið 2025/26 vóru 39 fólkaskúlar í Føroyum við íalt 7.130 næmingum, tveir frískúlar við íalt 165 næmingum og Skúlin á Trøðni, ið er ein serskúli, við 70 næmingum.

Størsti skúlin er Skúlin á Fløtum við 784 næmingum, og minstur er Húsar-Syðradals skúli við tveimum næmingum.

Tveir skúlar er munandi størri enn hinir, teir eru Skúlin á Fløtum og skúliná Skúlatrøð. Í teimum báðum skúlunum ganga meira enn 1500 næmingar, ella gott fimti hvør næmingur í fólkaskúlanum.

Skúlarnir eru býttir um alt landið: 5 eru í Norðoyggjum, 9 í Eysturoynni, 5 í Norðurstreymoy, 9 í Suðurstreymoy, 2 í Vágoynni, 4 í Sandoynni og 5 í Suðuroynni.

Talið av fólkaskúlum er minkað støðugt seinnu árini. Í 2010 vóru 52 skúlar, í 2015 43 skúlar, í 2020 41 skúlar til skúlaárið 2025/26 eru 39 skúlar.

Tveir skúlar eru einastu skúlar, har tað ikki er vegasamband til oynna, tað eru Nólsoyar skúli, har tað eru 10 næmingar, og Húsar-Syðradals skúli, ið hevur tveir næmingar. Tað hevur eisini verið skúli í Fugloy, men skúlaárið 2025/26 eru eingi børn í skúlaaldri á oynni.

Tað eru tveir frískúlar. Lítliskúli við 67 næmingum og Frískúlin Keldan við 98 næmingum. Tað vóru tríggir frískúlar, men Frískúlin í Havn læt aftur í 2024. Lítliskúli og Frískúlin Keldan hava báðir forskúla, tað eru 8 næmingar í forskúla í Lítlaskúla og 15 í Frískúlanum Kelduni.

Tað er ein serskúli í Føroyum, tað er Skúlin á Trøðni, har ganga 70 børn í fyrsta til tíggjunda flokki. Skúlin á Trøðni er vaksin seinnu árini, skúlaárið 2024/25 vóru 64 næmingar í skúlanum, og 23/24 vóru 61. Skúlin á Trøðni er skipaður eftir lógini um serskúla og hevur sína játtan á fíggjarlógini.

Næmingarnir í forskúlanum eru ikki taldir við í hesum tølum. Skúlaárið 2025/26 ganga 324 næmingar í 11 forskúlum. Verða næmingarnir í forskúlum eisini taldir við, so var Skúlin á Fløtum størstur við 850 næmingum frá forskúla til 9. flokk. Tá forskúlar eru taldir við, so eru í miðal 191 næmingar í hvørjum skúla.

Les eisini: Skúlablaðið