Ungdómsting fyri 10. ferð

Næmingarnir, sum eru á Ungdómstingi hesa ferð, koma úr Sandoyar Meginskúla, Runavíkar kommunuskúla, Skúlatrøð, Tvøroyrar skúla, Skúlanum á Fløtum, Skúlanum við Løgmannabreyt og Sørvágs skúla.

Tey 32 umboðini, sum umboða flokkarnar á Ungdómstinginum, verða vald í fýra nevndir, sum skulu viðgera uppskotini. Næmingarnir verða valdir í ta nevndina, sum skal viðgera tað uppskotið, sum tey sjálvi hava sent inn. Hvør nevnd viðger fýra uppskot. Nevndin skal í minsta lagi mæla Ungdómstinginum til at fella eitt uppskot. Nevndarlimirnir samráðast um, hvat av uppskotunum skal fella.

Tað var í 2005, at formansskapur løgtingsins gjørdi av at farast skuldi undir at skipa fyri einum Ungdómstingi. Ungdómsting verður vanliga hildið á øðrum hvørjum ári, har næmingar í 8., 9. og 10. flokkunum kring landið verða bodnir at luttaka.

Endamálið við Ungdómstinginum er:

• at geva næmingunum størri innlit í fólkaræðið
• at læra næmingar at vera ein virknari part av fólkaræðinum
• at vísa næmingunum í praksis, hvussu avgerðarmannagongdir virka í einum fólkaræði
• at geva næmingunum innlit í, hvør leikluturin hjá Løgtinginum er, og hvat arbeiðið hjá Løgtinginum fevnir um

Møguleiki verður eisini hjá umboðunum í Ungdómstinginum at seta spurningar til landsstýrismennirnar.

Tað ber til at lesa um øll uppskotini á heimasíðuni hjá Skúlablaðnum og logting.fo