Fyrireikingar til tvey eykaspor á Argjahamri og Fløtum

Tórshavnar kommuna hevur játtað 10 milliónir krónur til eyka undirvísingarhøli í Skúlanum á Argjahamri og Skúlanum á Fløtum; hølini skulu vera klár komandi skúlaár. Í miðstaðarøkinum í kommununi eru seks fólkaskúlar, og tá ið fleiri næmingar eru í økinum, enn pláss er fyri í skúlunum í nánd, har næmingarnir búgva, játtar landið ikki eyka tímar, um pláss er fyri næmingunum í øðrum skúlum. Í kommunum, har bara ein skúli er, játtar landið tímar til eykaflokk, tá næmingatalið fer upp um 22 næmingar.

Næmingatalið í skúlunum í Tórshavnar kommunu er sum heild høgt.

Í umsóknini frá Tórshavnar kommunu verður víst á, at fólkaskúlalógin leggur upp fyri, at skúlatilboð verður veitt næmingum í nærumhvørvinum, men at hetta ikki altíð er galdandi fyri næmingar í miðstaðarøkinum í Tórshavnar kommunu. Verður fígging veitt til eykaflokkar í Tórshavnar kommunu, verður næmingatalið í flokkunum í høvuðsstaðarkommununi framvegis millum hægstu í landinum, 20,2 næmingar í hvørjum fyrsta flokki.