Eftirútbúgvingarnar sera góða undirtøku

Stórur áhugi hevur verið millum lærarar at sleppa undir eftirútbúgving. Eftirútbúgvingarleisturin, sum Námsvísindadeildin á Fróðskaparsetrinum fór undir tíðliga í heyst, hevur fimm skeið á skránni hesa heysthálvuna. 

Tey eru:

·       flokslærarin og samstarv

·       konfliktfatan í námsfrøðiliga arbeiðinum við børnum og ungum

·       lívfrøði og náttúrulærufrøði

·       mál-, lesi- og skrivimenning

·       tøknifatan og talgildisútbúgving

Øll skeiðini eru væl umtókt; tað skeiðið, sum flest lærarar hava meldað seg til, er skeiðið um mál-, lesi- og skrivimenning.

- At áhugin er so stórur, bendir á, at tørvurin er stórur á førleikamenning innan hetta økið. Tí má skeiðið bjóðast út aftur skjótt, sigur Jacob Eli S. Olsen.

Stakskeið, ið verða boðin út á vári 2026, eru hesi:

· Kt-amboð og talgildar lærugongdir

· Relatiónsførleiki og floksleiðsluførleiki

· Náttúrufaksdidaktikkur – Útinámsfrøði

· Inkluderandi sernámsfrøði: Lesi- og skriviavbjóðingar og dysleksi

· Inkluderandi sernámsfrøði: Samskifti, relatión og trivnaður – Børn í kreppu, sorg og trauma

Øll stakskeið telja 10 ECTS. Skeiðini, ið verða boðin út skúlaárið 2025/2026, eru øll partur av eini skeiðsrøð, sum leiða til nýggju masterútbúgvingini í námsfrøði á Námsvísindadeildini. Stakskeiðini halda fram skúlaárið 2026/2027. T.v.s., at um ein skeiðsluttakari fær hug at fáa størri vitan um eitt skeiðsøki, so kann hann halda fram og velja eitt nýtt skeið í røðini árið eftir, og tá ein hevur trý stakskeið, kann viðkomandi fara í holtur við masterútbugvingina í námsfrøði.