PENGAR gevur ungum fatan av eginbúskapi

NÁM gevur saman við Felagnum Peningastovnar út nýtt talgilt undirvísingartilfar til samfelags- og støddfrøði í 9. flokki. Tilfarið verður nevnt Pengar.

28.08.2025

Felagið Peningastovnar hevur tikið stig til og fíggjað verkætlanina, sum Karina Toftegaard, ritstjóri í Námi, hevur týtt úr donskum. Í Danmark hava tey í mong ár varpað ljós á pengar í viku 11, og tey nevna hetta átakið fyri Pengeuge.  

Endamálið við tilfarinum er, at børn og ung skulu læra búskaparlig hugtøk úr gerandisdegnum, og at tey á henda hátt fáa áræði og royndir at taka støði í egnum búskaparligum viðurskiftum, ella eginbúskapi, sum tað verður nevnt í Støddfrøði 9.

Ráðgevar úr øllum fýra peningastovnunum eru tøkir at luttaka í undirvísingini eftir áheitan frá lærarum. 

Á einum ungdómstingi varð skotið upp at gera eginbúskap til serstaka lærugrein í 9. flokki, tí tá kundu øll vera við og fáa grundleggjandi vitan um eginbúskap.

- Eginbúskapur er ikki vorðin ein serstøk lærugrein, men er partur av námsætlanunum í støddfrøði og samfelagsfrøði, og tað er okkara vón, at hetta tilfarið kann vera við til at geva teimum ungu eina fatan av eginbúskapi og eitt grundarlag at byggja víðari á, sigur Sigfríður Símunarson Sólsker, fyrrverandi útgávuleiðari í Námi.

Nýggja talgilda tilfarið úr Námi, Pengar, gevur í fimm kapitlum innlit í hópin av peningaviðurskiftum, so næmingurin í 9. flokki kann fylgja við.

Í fyrsta kapitli verður byrjað við søguni um, hvussu pengar blivu til. Í øðrum kapitli læra næmingarnir, hvussu teir kunnu fáa ráð til at keypa tað, teir droyma um. Í triðja kapitli læra næmingarnir um, hvat tað vil siga at taka lán. Í fjórða kapitli verður nomið við íløgur, sum tú kanst gera, tá ið tú frammanundan hevur so mikið av uppsparing, at tú eigur pengar at seta til viks til hetta endamálið. Fimti og seinasti kapittul hevur yvirskriftina Ansa eftir pengunum. Har verður lært um trygd við egnum pengum, serliga tá goldið verður fyri vørur og spøl við talgildum flytingum.

Les alla umrøðuna, sum Birgir Kruse hevur skrivað, í Skúlablað nr 4, 2025.