Náttúra og tøkni í landsroyndunum og námsfrøðingar í fólkaskúlanum

Fólkaskúlaráðið, sum tók við fyrst í hesum árinum, fer í næstum undir at viðgera spurningarnar, um, hvørt náttúra og tøkni royndin í 4. flokki framhaldandi eigur at verða partur av landsroyndunum, og hvør leikluturin hjá námsfrøðingum í fólkaskúlanum eigur at vera.

27.08.2025

Tað er Barna- og útbúgvingarmálaráðið, sum hevur biðið Fólkaskúlaráðið viðgera spurningarnar.

- Báðir spurningarnir, hvørt náttúra og tøkni eigur at vera partur av landsroyndunum, og hvør leikluturin og hvørjar uppgávurnar hjá námsfrøðingum í fólkaskúlanum kunnu vera eru viðkomandi at viðgera og gerast niðurstøður um. Hugsandi er, at vit eru komin á mál við tí seinna spurninginum um ársskiftið og tí fyrra rættiliga skjótt, tí undanfarna Fólkaskúlaráðið arbeiddi við spurninginum og gjørdi eitt tilmæli. Hetta taka vit fram aftur, viðgera og koma við eini niðurstøðu, sigur Jónleif Johannesen, formaður.

Undanfarna Fólkaskúlaráðið metti ikki, at landsroyndirnar skulu halda fram í verandi líki. Mælt varð til, at arbeiði verður sett í verk at menna landsroyndirnar til eitt námsfrøðiligt amboð, ikki at seta tær úr gildi, men tillaga og gera greitt, hvat og hvussu landsroyndirnar skulu nýtast.

Tað, sum farið er av fyrsta skeiðinum hjá hesum Fólkaskúlaráðnum, hevur verið merkt av hoyringsskrivum og stóru lógarbroytingunum, sum eru gjørdar í fólkaskúlalógini. Ráðið hevur eisini viðgjørt uppskotið hjá landsstýrismanninum um telefonpolitikk í skúlunum og næmingaráðini. Hesar uppgávurnar eru allar avgreiddar.

Nýggja Fólkaskúlaráðið tók við 1. januar í ár og situr í trý ár. Uppgávan hjá Fólkaskúlaráðnum er at geva landsstýrismanninum ráð í øllum málum um fólkaskúlan. Fólkaskúlaráðið kann umrøða og gera tilmæli til landsstýrismannin um arbeiðsøki, skipan, faklig-, námsfrøðilig- og trivnaðarlig viðurskifti í fólkaskúlanum. 

Í Fólkaskúlaráðnum eru Jónleif Johannesen, skúlastjóri á Skúlatrøð, formaður, Høgni V. Warberg, fulltrúi í Barna- og útbúgvingarmálráðnum, samskipari, Rúna í Skála, námslektari í námsfrøði og frálærufrøði, útbúgvingarleiðari fyri læraraútbúgvingina, Nomi Jacobsen, skúlastjóri í Skála skúla, Súni Jacobsen, lærari í Gulaskúla, Henny Dánialsdóttir, lærari og ráðgevi í Námi í handaverki og list, Jacob Eli S. Olsen, formaður í Føroya Lærarafelag, Janus Vang, umboð fyri Foreldrafelagið Heim og skúla, Maria á Boðanesi, ráðgevi í Sernámi, og Annbritt Toftegaard, fulltrúi í Undirvísingarstýrinum, skrivari.