MMR vil sleppa av við teldupartin í fólkaskúlanum

- MMR roynir av øllum alvi at sleppa av við teldupartin og fáa kommunurnar at yvirtaka hann, sigur Herálvur Jacobsen, formaður Føroya Lærarafelags

11.12.2017

Sambært arbeiðstíðaravtaluni hevur Mentamálaráðið skyldu til at geva skúlunum tíð til røkt og undirvísing, í mun til næminga- og læraratal og í mun til talið av telduútbúnaði, so sum teldur, teldlar og samvirknar talvur. Sambært Mentamálaráðnum svarar hetta til gott og væl 13 ársverk í fólkaskúlanum á hvørjum ári, harav nærum 10 fara til røkt av teldu; landsstýriskvinnan, Rigmor Dam, sigur í seinasta Skúlablaði, at pengarnir verða ikki brúktir skynsamt, og at Mentamálaráðið ikki vil rinda fyri røkt. Føroya Lærarafelag og felagið hjá kt-vørðum hava fleiri ferðir heitt á myndugleikarnar um at viðgera spurningin, hvussu arbeiðið hjá kt-vørðum skal skipast, men tað hevur verið sum at sletta vatn á gás, sigur formaður Føroya Lærarafelags.

- So leingi eingin avtala er millum Mentamálaráðið og kommunurnar um, hvør skal rinda, so eigur Mentamálaráðið at rinda fyri kt-partin í fólkaskúlanum. Í arbeiðstíðaravtaluni er ásett, at telduvørðurin skal brúka 80 prosent av tíðini til røkt og restina til námsfrøði. At skilja tøkni og námsfrøði sundur ber ikki til, heldur ikki í einum brøki, tí markið millum, nær tað er tøkni, tú fæst við, og nær tað er námsfrøði er ógvuliga flótandi; hesir partarnir fara inn í hvør annan, sigur Herálvur Jacobsen.

At Mentamálaráðið sær tað sum ein trupulleika at rinda 13 ársverk til teldupartin í fólkaskúlanum, dugir formaður Føroya Lærarafelags illa at skilja.

- Mentamálaráðið hevur ongantíð viljað átt teldupartin í skúlanum, t.d. hava kt-vørðir og lærarar annars bíðað 15 ár eftir útbúgving og eftirútbúgving; hyggja vit hinvegin at øðrum londum, so ganga tey á odda at skapa framburð fyri skúlarnar á telduøkinum. Í Føroyum er øvut; Mentamálaráðið átti heldur at fegnast um, hvussu stóran mun teldurnar gera í skúlaverkinum, og hvussu stóran framburð tær hava verið við til at skapt. Allur framburðurin er takkaður teimum nú 13 ársverkunum. Ein av stóru fyrimununum í okkara skúlaverki er júst, at kt-vørðirnir eru lærarar og tí allatíðina hugsa tøknina í undirvísingarhøpi.

Vil Mentamálaráðið hava kommunurnar at rinda fyri teldurnar, má ein avtala verða gjørd við kommunurnar. Herálvur Jacobsen ivast í, um kommunurnar glaðbeintar vilja yvirtaka hesar útreiðslurnar.

- Henda tvístøðan um, hvør eigur at gjalda, skapar ófrið; stundin er komin til at avgreiða spurningin, soleiðis at kt-vørðirnir fáa nøktandi arbeiðsumstøður og eftirútbúgving. Seinasta stigið hjá Mentamálaráðnum er at avmarka útreiðslurnar til kt-økið soleiðis, at tey í mesta vilja rinda fyri telduútbúnað svarandi til næminga- og læraratalið í einstaka skúlanum; hetta hámarkið forðar fyri menning, tí næmingar og lærarar mugu hava atgongd til teldur alla tíðina alla staðni í skúlanum.

Landsstýriskvinnan sigur í samrøðu við Skúlablaðið, at tá ið spurningurin um teldupartin er útgreinaður og avgreiddur, ber eisini til at fíggja og arbeiða miðvíst við útbúgvingum til kt-vørðir. Les samrøðu við Rigmor Dam í Skúlablaðnum, sum júst er komið, og somuleiðis sjónarmið frá formanninum í kt-varðafelagnum, Jákupi av Skarði.